جمعه دوازدهم بهمن 1386
نیله ییم دیل سیز بیر باش چکن میره م (شکیل)
بیر ائلی بوراندا قاردا چکه جم 
بیر ائلی باهاردا واردا چکه جم
***
بیرشکیل چکه جم گؤزگیله سینه
آرزیلار دؤزوله سیل سیله سینه
بیر باهار سالاجام قیش چیله سینه
بیر لالا خونچاسین قاردا چکه جم
بیر داغی چکه جم دومان ایچینده
بیر یاخشی بیتیرم یامان ایچینده
بیر حقی دوغرولدام گومان ایچینده
شاخدادا بیر آغاج باردا چکه جم
بیر سئلی چکه جم سارا قوینوندا
بیر دیلی آسیلی چارا قوینوندا
بیر ائلی یارادام یارا قوینوندا
بیر دیلی دیلچک سیز داردا چکه جم
تیکیلی بیر آغیز، چکه جم بوما
بیر درین باخیش کی ، فیکیره جوما
یوللایام شکیلین تهرانا ، قوما
بیر ائلین یوخلوغون واردا چکه جم
بیر ایشیق چکه جم اوزاقدان آتیب
بیر دنیز چکه جم دنیزه باتیب
بیر ائلی چکه جم مین ایلدی یاتیب
وارلیغین بیلمیرم هاردا چکه جم
نئیله ییم دیل سیز بیر باش چکن میرم
سینمده اؤرک وار ، داش چکن میرم
بو ائلین ماهنی سینی ، تاردا چکه جم
ائلیمی باهاردا واردا چکه جم
استاد هوشنگ جعفری
